藝人黃嘉樂與趙璧渝於劇集《法言人》內組成的CP深受觀眾注意。今日（24日）祝捷會上，二人先後感性多謝台前幕後幫忙，尤其趙璧渝更講到多次哽咽，令人動容。
事後受訪時，嘉樂坦言：「真係好多謝家豪哥（監製劉家豪）團隊一直幫我鋪路，每套劇都一路咁加添我嘅戲份。工作人員又鼓勵我拋開本身嘅性格，將角色演繹得開心啲，拍拍吓我都變得好開心，當然最開心係因為我太太，佢陪我睇劇嘅時候，就「投訴」我扮佢啲小動作。」
趙璧渝即接口：「佢太太好好，竟然幫我哋Cap圖，仲問我點解我哋冇咀戲，真係好大方。」嘉樂笑到着解釋：「佢好奇怪，又要嬲又想睇咁！」談到當眾哽咽，璧渝自言開工時壓力大：「要多謝嘉樂呢位咁好嘅拍檔，同埋真係估唔到網民咁鍾意我哋。（有咩新工作？）拍緊劉嘉豪嘅《逆天奇案2》，都開咗一段時間，最難忘係依家夏天，但要着冬天衫。（妳係咪好似嘉樂咁，戲份愈嚟愈重？）真係要多謝嘉豪哥，希望愈嚟愈重戲啦。」
