藝人馬國明同湯洛雯（靚湯）今年元旦宣布結婚喜訊後，二人嘅婚禮同婚照都備受外界關注，對此馬國明僅透露婚紗相計劃出埠影外，婚禮其餘細節都未有表明，不過婚後生活就早有計劃。
而同靚湯愛得高調嘅馬國明一改昔日低調作風，更甜蜜表示佢哋早已同居試婚互叫老公老婆，原來馬國明有咁大轉變係受靚湯影響，佢表示以前社交網都係Po工作有關嘅事，不過同靚湯一齊之後先明白，不時喺社交網同大家分享快樂心情嘅雙倍幸福。
佢亦大讚靚湯為人樸素顧家，即使只係一杯雪糕已經可以食得好開心，平淡幸福嘅婚姻生活亦係佢哋追求嘅，至於生兒育女方面，佢就對性別冇咩追求，只希望將來可以生一對仔女組織幸福家庭外，喺爹哋媽咪走咗之後，小朋友都可以互相作伴，唔會孤伶伶有事都冇親人可以商量。
