藝人胡杏兒為燒肉席擔任一日店長，身為三子之母的她，被讚身材依然Fit爆，她開心說：「依家110磅，為健康囉，都咁上下年紀，都要有體力陪3個仔玩，所以除咗做運動，都好注意飲食。（係咪同未嫁時一樣瘦？）嗰時我都好瘦嘅。」
現疫情過後全面開關，稍後她將往橫店開拍古裝劇，會帶不用返學的孻仔同行，為期約3個月，但期間可隨時返港：「我喺香港都有嘢做，好耐冇拍古裝劇，係女主角之一。（屆時橫店好熱喎，做乜咁辛苦？）我都陪咗小朋友一段時間，其實個角色都唔係好忙嘅。（因為酬勞好好？）都OK啦。」
問可會再拍港劇，她稱有機會，自問要求不高，接劇要視乎劇本，角色及時間，而她是收開心價酬勞，又謂聽見粉絲說是看其劇成長，覺得是開心事，而無綫幾年前曾傾合作，只是因懷孕才未能跟娘家合作。
