肥媽（Maria Cordero）、李家鼎（鼎爺）及游嘉欣（游游）主持的全新飲食節目《肥媽李鼎》星期一晚（24日）正式首播。大家都知肥媽同鼎爺係圈中廚藝高手，肥媽以「平靚正快」見稱，鼎爺則擅長追求細緻的傳統功夫菜，今次兩位首次主持飲食節目，再加埋有「00後」游嘉欣加盟，究竟會有咩火花！？
粗豪的鼎爺唔止武得，仲好煮得，講到由武術指導兼演員變做真正「教煮」係幾時，佢就話源於一個女人，就係珍姐啦！「想當年有個曾勵珍監製嘅處境劇《香港＇82》，要拍一場食飯戲，點知道具餸出咗事，有人食完又屙又嘔，嗰味係蘿蔔炒魚鬆…阿珍話咁叻你煮吖，我話我驚你呀，煮咪煮囉，阿珍食完之後佢就記得喇。30年後，拍咗個《男人食堂》，你知我把口唔曉停，同肥媽差唔多，佢哋話見我幾Talk得，阿珍就叫我不如煮嘢食啦，咁就整咗個《阿爺廚房》出嚟。」 就係咁，鼎爺撈到風生水起，仲連私房菜都搞埋，人紅起上嚟擋都擋唔住！肥媽之後追問鼎爺爆紅後有咩感覺？鼎爺好瀟灑咁以8個字概括：「人情冷暖，世態炎涼。」睇嚟鼎爺都係一個有故事的人！
兩位大廚同場「鬥煮」，而游游就係節目中嘅「氣氛擔當」，鬧出連串笑料。游游唔算叫「入得廚房」，難得有咁嘅機會，當然即刻向鼎爺、肥媽「取經」啦，但就成日提問蠢問題，問到佢哋口啞啞，勁好笑！另一方面又糖鹽傻傻分不清，幫手切材料時又被嫌手腳慢，撻蝦膠時又被嫌唔夠力，搞到鼎爺投晒降咁話：「真係怕咗你！」肥媽再打蛇隨棍上話：「阿爺咩都未驚過，連珍姐都夠膽叫阿珍，佢淨係驚你！」 唔識煮唔緊要，好彩氣氛搭夠！游游亦唔介意做「下把位」，笑言：「呢個真係我真實演出，全部烏龍嘢係好突然發生嘅，煮嘢食嘅過程基本上唔會Cut，都係做番平時嘅自己，可能我都係比較多問題嘅一個人，所以好多時都會好好奇咁問問題，有時又會口快快講錯嘢！」
至於星期二（25日）晚播出一集主題是「廚藝界的明爭暗鬥」，講到最精彩花生位不外乎講錢！游游問到大家最關心的問題：「星廚係咪好賺錢？」肥媽就直認不諱：「我認係喎，以前未煮飯時，我都有做代言，但未有咁多（收入）。」
現年23歲的游嘉欣可謂夠曬青春，之前主持開飲食節目都係見到鼎爺同譚玉瑛做拍檔，或者肥媽配陸浩明（六號）老是常出現！不過今次換上「00後」游嘉欣，即使唔識煮，都起碼睇得先啦！總算有啲新鮮感！
文章版權為新傳媒集團所擁有，原文請按： 网页链接
