前韓國女團CLC成員莊錠欣(Elkie)的家姐莊易羚(Axity)去年8月低調簽綫無綫加入《娛樂新聞台》做主持，憑住甜美外貌，加上高䠷身形成功突圍而出，在短短半年時間，就極速上位加入劇組拍攝劇集，可謂「前途無可限量」。
昨日（31/3）莊易羚現身將軍澳電視城出席無綫新劇《非常檢控觀》造型記者會。她透露在劇中飾演一名時裝設計師：「劇情講我細個嘅時候，因為妒忌江嘉敏畫畫叻，加上知道佢家境唔好，就走去欺淩佢。而我為咗今次嘅角色，我特登去睇電影《踏血尋梅》。」
莊易羚續指希望可透過電影令到自己更加變得黑化，但睇的過程相當辛苦：「因為當中有好多殘忍肢解鏡頭，我係睇到暈，心跳加速仲大叫咗出嚟，嚇到我媽咪問我發生咩事。因為本身我個人係好細膽，連見到人流血我都會驚嘅人嚟，變咗要演呢啲黑化角色，對我嚟講係有好大挑戰性。（怕唔怕太過入戲抽嚟唔到？）我都驚，不過好彩我都會同屋企人傾偈去平衡返自己個心態。」
