現年66歲的王俊棠，在《愛回家之開心速遞》中飾演池富一角，前排因為他經常留在內地，所以很少出現，不過最近，他終於「愛回家」喇！上周的劇情講到池富因為請假，而被根叔（劉丹 飾）搶去「好快啲酒」的代言人。
王俊棠早前接受《香港演藝人協會》訪問，坦言想多演其他不同角色，因為每逢有大奸大惡的角色，王俊棠都必定會被想起，原來他都不太想經常做奸角。他指自己可以演較為傻氣、面惡心善的角色，「我演《愛回家》角色，都係市井之徒，又貪慕虛榮，總之唔係大奸大惡，我希望多啲機會演其他角色，就算演傻佬都冇所謂。」
未入行前，王俊棠在中環一間夜場「Disco Disco」做門衛。80年代，兩位導演李修賢和王鍾特登去「Disco Disco」，問王俊棠有沒有興趣拍戲，於是就參演了首部電影《流氓公僕》，王俊棠說：「拍呢部戲，有少少嘢要犧牲，因為要全裸，我飾演一個心理變態嘅攝影師，被李修賢帶咗上去露台，剝晒我啲衫；嗰陣已經好犀利，要裸跑，ok嘅，跟住個個都裸跑，成龍又裸跑，洪金寶又裸。」
1997年，王俊棠被監製鄺業生睇中，邀請他入無綫參演《陀槍師姐》，飾演聶世官，他說：「當時仲未簽TVB，淨係拍呢套劇，拍完《陀槍師姐》，又問我仲有冇興趣，監製李添勝搵我拍《鹿鼎記》演鰲拜。唉，我做得好失敗，當時我冇拍過古裝，演繹人物嘅時候，我冇去鑽研呢個角色，應該要用低沉啲聲線，語氣要有變化。我經驗唔夠，惟有邊做邊學，做戲唔係咁簡單，一個奸角有好多種演繹方式。」
由於兒時不喜歡讀書，於是父母為他報讀香港航海學校，畢業後便開始行船。可惜期間，王俊棠不慎跌倒，導致腳部骨折，於是結束行船生涯，跟朋友投考警察。「做做吓，覺得好悶，因為輪班制，早午晚三更，跟住我就落番船，之後因為我嘅親細佬意外離世，我就決定留喺香港，因為得番我一個仔。」
撰文：黃曉妍
