前港姐劉倩婷、唐麗球、鄭文雅及梁凱晴等，下午出席「慧妍雅集41周年慈善晚會2023」記者會。談到相關晚會因疫情已停辦3年，身為該盛會主席的劉倩婷透露：「啲贊助商都等咗3年，今年會3月24日舉行，依家已經有約40圍嘞，成績相當理想。（預計會籌到幾多善款？）應該已經有幾百萬，幾年前我做會長嗰已經試過籌得600萬，總之大家努力，籌得幾多就幾多，可以幫到更加多有需要嘅人士。」她又表示當晚已要得不少特別嘉賓，包括蘇永康獻唱。
談到解除口罩令，劉倩婷笑指自己亦不習慣：「我大女已經冇戴口罩返學，因為佢哋讀國際學校，同學仔都冇戴嘞。我身邊啲朋友終於可以睇清楚我細女個樣，佢今年兩歲，未試過唔戴口罩出街。」
身為「碎屍案」蔡天鳳閨蜜的她，提起故友忍不住眼濕濕：「其實今日唔想講太多，只係希望佢成家人健康平安，我諗呢件事唔係短時間內可以接受。（最懷念佢啲乜？）太多嘞，今次慈善晚宴，佢都有幫我手搵贊助，如果佢仲在生，當晚應該會出席，佢係一個大慈善家。」劉倩婷又指有與蔡天鳳丈夫保持聯絡，相信稍後會得悉出殯日期。
