香港電台去年同無綫合辦《香港金曲頒獎典禮》，結果劣評如潮，大批歌手缺席，簡直星光暗淡。日前港台新春團拜，廣播處長張國財宣布港台5月將獨自舉辦《廣播95年——十大中文金曲頒獎音樂會》，即係狠拋無綫咁話。而上周六(4日)港台就喺社交專頁貼出投票網站，投票活動主題係「廣播九十五周年十大中文金曲」，截止日期為本月18日。但係睇返港台頒獎嘅候選名單，似乎大量歌手都被「封殺」未見入圍，惹來好多歌迷不滿！
網民對新人獎嘅候選名單抱怨最大！事關大量當紅歌手都慘「被消失」，無辦法擠身入圍名單，例如COLLAR、趙祥誠一樣消失，網民質疑港台「圍威喂」。原來根據選舉準則，歌手要角逐新人獎就必須於選舉期內，首次推出個人主唱華語或粵語歌曲，同需經在香港首次發行嘅唱片發布，或經唱片公司授權網站供樂迷合法下載；最重要係歌曲於選舉期內，要曾登上「中文歌曲龍虎榜」；並經由唱片公司提名，均自動成為候選新人。 睇返紀錄，COLLAR去年曾有《Call My Name！》及《OFF/ON》打入「中文歌曲龍虎榜」的第3及第2位，而兩首歌都有入圍角逐「十大中文金曲獎」；可能其公司無幫COLLAR報名，先係佢地無法角逐新人獎的原因。
登入港台嘅投票網站，見到有6個獎項可以投票：「十大中文金曲獎」、「優秀流行歌手大獎」、「優秀流行華語歌曲獎」、「最有前途男新人獎」、「最有前途女新人獎」及「全球華人至尊金曲獎」 但有眼利網民發現被傳遭港台「封殺」嘅謝安琪、許廷鏗、Serrini、方皓玟同樣消失投票名單上，連橫掃 多個嘅頒獎禮威風八面的林家謙、近日開騷人氣急升嘅陳柏宇、陳蕾、岑寧兒都齊齊消失，無法角逐「優秀流行歌手大獎」，反而「四大天王」嘅郭富城、劉德華，年過七十嘅譚詠麟就有份入圍，份量級前輩齊齊同後生爭獎咁話！
港台今年隆重其事，《十大中文金曲頒獎禮》誓於5月6日假紅館大搞，港台已向唱片公司廣發邀請，消息指大派歌手都答應出席，同去年和無綫合辦《香港金曲頒獎典禮》，星光暗淡嘅場面完全兩回事。有傳MIRROR將於5月出席港台嘅頒獎禮，係佢地自演唱會事故後，首度合體再登紅館舞台，對自爆有創傷後遺症嘅「鏡仔」來說，紅館舞台絕對係一大考驗！ 鏡粉一向出名投票最有效率，頒獎禮消息一出已經唔少fc為偶像拉票，相信不少獎項絕大機會成MIRROR嘅囊中物。
文章版權為新傳媒集團所擁有，原文請按： 网页链接
