藝人林峯偕同太太張馨月及囡囡返港，與家人歡度新歲，談到新年願望，他坦言：「好開心大家生活開始慢慢重回正軌，希望新一年大家身體健康，各行各業都大展鴻圖、生意興隆！」回顧過去的一年，阿峯參與了電影《九龍城寨．圍城》及多個電視節目的拍攝：「喺《九》片入面，我扮演嘅角色係一個好新嘅嘗試，有好多場打戲搞到周身傷晒，但製作團隊非常專業，辛苦啲都係值得嘅，非常期待電影上映。」
談到展開了農曆年期，他坦言要多陪父母及家人，當然亦會大派利是：「最緊要大家開心啫，我一年到晚都忙於工作，係得呢個時間可以停低，有機會同親戚朋友見面，所以非常珍惜呢個假期。（兔年有乜工作大計？）好快就會參與新電視劇嘅拍攝，而且都開始揀緊新歌，希望大家會鍾意啦。」
