黎諾懿與邵珮詩分別以小小漢語普及愛教育基金大使及委員會身份出席電影慈善場，諾懿表示今日（21日）收爐，直至年初四再到澳門工作：「之後就會休息吓，趁空檔構思新節目同寫好份計劃書，我已經有兩個構思，都綜藝為主，唔係關於烹飪或者清談，我想度啲新嘢。」至於新年，他稱會跟家人過，亦不用他親自下廚：「佢哋向來好錫我，新年唔使我煮，畀我可以飲吓酒嘻嘻哈哈，今晚會買盆菜。」
而邵珮詩擅長普通話，有為基金會到幼稚園教國語，問她是否教到嘔血？她笑言：「我一入到課室，小朋友衝過來攬住我，原來我同小朋友好有緣分，佢哋又猛讚姐姐你好靚，佢哋都好聽我話，好受教。我有語言天分，識得廣東話、國語、英語同日文，希望將來同語言有關嘅中心合作。」提到幕前工作，珮詩指主要集中主持及綜藝方面：「至於拍劇，我暫時要養生啲，我捱唔到咁長時間，加上我急性子，我偏向做綜藝同主持，稍後會出國睇吓有乜搞作。」
