昔日無綫小生吳啟華日前重返無綫，擔任《萬千星輝頒獎典禮2022》嘉賓，勾起不少觀眾集體回憶。近日佢接受內地節目《麗人麗語》訪問，重提年輕時曾到英國讀書，慘遭當地人歧視：「會叫你Chink，行街無端端畀人打都有嘅，同自己好朋友嘅鬼仔傾偈，佢哋都好大鼻，『我哋大英帝國，你哋區區殖民地』。」而於內地定居多年嘅佢，又大讚內地生活指數高：「香港街市買餸閒閒哋一千幾百一次，內地三、兩百都Ok。香港唔好講買樓，租屋都唔掂，內地輕鬆買間屋，仲要大嘅，香港啲樓細到，100平方米已經係豪宅㗎啦！」
其實吳啟華早年已喺中山置業，去年又爆出於深圳買樓定居，有指佢北上發展後賺到荷包「漲卜卜」，2018年更一口氣狂掃大灣區6個單位，160萬一間，絕對係大灣區樓王！
