昨日富商大劉劉鑾雄高調召開記者會，澄清同前女朋友麗君並冇復合外，仲為喺皇室堡發火鬧踎地男作出解釋。心情大靚嘅大劉有問必答，訪問足足歷時一個半小時，期間大劉用咗好大篇幅數蕭若元，事關後者喺元旦於其YouTube頻道「蕭氏新聞台」仔細分析大劉出聲明澄清與呂麗君以及甘比關係，意慾為何。
大劉先係表示自己冇「躁狂症」，又指名道姓指蕭若元屈佢狂躁，稱唔識對方，「蕭若元喺自己YouTube平台講到同我好熟？食過十幾次飯？單獨見兩三次？（事實）我淨係同佢見過一次面。我好同情佢，如果我出啲咁嘅網站我都發達啦，佢只係想多人睇多人聽有廣告。（對於蕭若元）我淨係記得一樣嘢，當時我問黃玉郎請呢條友幾多錢，佢話二十幾萬……三十六、七年前嘅事，我問點解咁貴，你知唔知佢點答我？『佢好叻㗎啲英文luk luk聲』，我話英國掃垃圾啲人英文都luk luk聲！」
之後大劉打比喻：「當然你有權請個八十幾歲阿婆做你條女，一千萬美金一個月或者一分鐘都得係你自己嘅決定。」大劉有讚蕭若元係叻人，但只係叻佢自己個「層次」，指佢天份係電影度橋，又再次稱「同情」佢：「佢個仔同佢家姐間公司破產，佢又生意失敗走咗去台灣，任何人如果我有講錯隨時歡迎你上嚟向我挑戰。邊個識蕭若元幫我同佢講聲『求求你讓我躲』，你唔掂？我幫過咁多貧苦人家我唔怕幫埋你。你搵食啫去第二個人嗰度，唔好借我個名嚟talk 3 talk 4, 講三講四，我理解，同情佢，佢掂都唔使走去台灣。」
蕭若元今日亦立即出片反擊，佢喺片中表示：「我畀大劉痛斥，畀人痛斥到慣，我有咁多haters！畀咁有錢嘅人公開鬧係少見啲，我會作出回應。」蕭若元先解釋：「我話佢有躁狂症，第一係網民講嘅嘢，唔係專業人士講嘅，我所謂嘅『躁狂症』係指啲人係咁發脾氣，脾氣好猛烈，自己控制唔到，發得比較多。但如果醫生話佢冇，我願意澄清這件事。」續指：「創傷後遺症就係引起躁狂，其實兩樣嘢係冇咩分別，表達自己有創傷後遺症有兩種方法，一係憂鬱，一係躁狂，又有啲係又憂鬱又躁狂。你可以send email來指證我錯咗，我一定更正，事實錯咗就錯咗。第二，如果係嚴重錯誤，我會道歉。關於劉生都係一樣，我講嘅嘢邊啲係錯嘅，你指正我。例如話躁狂，如果你話有醫生證明，咁你叫醫生寫封信畀我，我咪道歉囉！」
蕭若元重申，佢講大劉嘅影片點擊率，唔及他過往談論其他藝人嘅影片，「我第一條片都百幾萬啦，許志安條片都七、八十萬，許志安嘅新聞性都遠遠在你劉生之上，唔好以為有錢人大晒！歷史上有錢人係冇咩社會地位！你覺得自己嘅重要性就係overrate自己，李嘉誠都冇咩地位，何況係你？李兆基就一定冇地位，何況係你？我唔會主動講李嘉誠、何鴻燊，因為佢哋係列入商界十大梟雄。我睇唔到你（大劉）生意上有咩傑出表現，冇你咁有錢嘅人都列入去。劉生，你淨係炒下地產，我見唔到你有咩成就。」
