藝人黃宗澤今年入行23年…

藝人黃宗澤今年入行23年,有意演而優則導,笑言可與好兄弟吳卓羲及林峯合演電影《三傻出城》。講到感情事,他自言在單親家庭長大,從沒成家立室憧憬,甚至可能終身不婚!

黃宗澤(Bosco)闊別5年再拍無綫劇《法證先鋒V》,雖已身經百戰,但參演如此經典系列劇集,他亦難免感壓力。對於劇集與MIRROR正、副隊長Lokman及Anson Kong等主演的ViuTV劇集《繩角》對撼,他認為劇種不同難以比較,但有多元化選擇也是好事。談及《法》劇突然變成台慶劇,令他有份入圍視帝,他表示完全沒想過爭獎:「從來唔係為攞獎而拍劇,反而觀眾覺得好睇,喺街撞到同我講,我仲開心,個獎又唔識同我講嘢。」

早前Bosco錯失與好兄弟吳卓羲及林峯參加內地節目《披荊斬棘》的機會,他坦言可惜:「因為喺電視史上,我哋3個一齊參加一個節目或演同一套劇係未試過,我唔介意去呢啲綜藝節目,當玩冇所謂,我又唔係賣唱功,如果唱歌嘅話,我負責Rap囉!唔好諗贏輸,當係娛樂,輸咗又唔使死,又唔係要息影,我都試過重唱《K歌之王》啦!」
他認為3人合作一定很開心,更提議:「希望一齊拍喜劇,唔好又打打殺殺,輕輕鬆鬆有得笑咪好囉!拍套《三傻出城》都OK!」除希望3兄弟合作外,他表示做幕前多年,也想試做幕後:「都想做導演,畀人拍咁多年,拍吓人囉!(搵邊個做主角?)我想搵新人,覺得胡子彤幾好。」

談到感情生活,Bosco表示過去一年拍了3部電影及3部劇集,根本沒時間談情說愛,問到想不想拍拖?他說:「冇乜所謂,隨緣啦!撞到就撞,家人冇催婚,我係單親家庭長大,從來冇呢啲一家三口、一家四口嘅畫面,亦冇諗過幾時結婚。(唔結?)都有可能。」




Leave a Reply

Your email address will not be published.