黎諾懿早前宣布以破天荒形式續約無綫…

黎諾懿早前宣布以破天荒形式續約無綫,強攻幕後做大騷監製,廚藝了得的他原來同時發展副業,加盟飲食集團成為創意大使,準備在飲食界大展拳腳!他曾主持不少飲食節目,亦有親身落場晒廚藝,早年更推出過賀年糕點及月餅,外間反應不俗,在一次偶然的機會下,令他萌生轉戰飲食界的念頭:「有次食飯識到呢個集團嘅老闆,大家傾傾吓發現理念好相近,好快就拍板話合作。同埋最吸引係佢哋有廿幾間餐廳,唔會局限某種菜式,所以想試吓自己駕唔駕馭到。管理方面我唔太在行,所以就負責設計菜式,除咗保持品質之餘,賣相都要吸引。」
短短幾個月內,諾懿先後設計了4個菜式,他笑指平日會趁主持節目向身邊名廚偷師,所以已收穫很多寶貴經驗,準備大派用場。問到可會邀請圈中朋友加盟?他直言即使是朋友及親人亦不會合作做生意,免得為錢反目。
要囝囝面對失敗

提到今次加盟費達7位數字,諾懿不諱言已把續約無綫的酬勞上繳:「有時啲嘢係要投資,呢行始終被動啲,所以要兩手準備。(太太無限量支持?)佢唔識呢方面嘅嘢,所以唔會插手,平時財政分得好開,只要每個月有張支票畀佢就OK。(餐廳有咩目標?)希望每個鍾意嘅商場都有自己嘅餐廳,帶個仔去,會話佢知爸爸有份。」問到會否讓兒子做接班人?他表示:「任何嘢都唔會畀佢,但開咗戶口畀佢儲錢,等佢有理財概念。如果畀晒佢係好『溫室』,我要佢28歲前嘗試晒失敗,到30歲就可以有本錢贏返嚟。」




Leave a Reply

Your email address will not be published.