早排到內地拍劇3個月嘅洪永城(Tony)…

早排到內地拍劇3個月嘅洪永城(Tony),日前終於返港,咁耐冇見屋企人當然要即刻飛返去攬吓大家啦,佢太太梁諾妍(Inez)就喺社交網發放短片,留言:「爸爸?古怪叔叔?洪寶傻傻分不清,期待了呢個畫面好耐,3個月後終於見返,究竟係爸爸想念到哭定係洪寶認唔出到哭?定係認得唔哭?睇片睇真相!最後仲話自己要扮外國人做咩事?」

片中Tony返到屋企諗住行埋去掂吓前世情人隻手仔,點知囡囡個樣呆咗一陣,之後就大喊出嚟,明顯唔認得爸爸,可憐嘅Tony即刻雙手掩面扮可憐,之後Inez就嘗試將手中嘅女女交畀Tony,結果囡囡大喊、Inez就喺度大笑,仲對住鏡頭話囡囡平時唔怕陌生人添,好在屋企隻愛犬仲認得Tony。結果15分鐘後,Tony扮外國人用英文同囡囡講嘢,奇怪地囡囡就唔再喊喇,認真搞笑。圈中好友紛紛留言話笑爆嘴,李佳芯留言:「陰功,但好好笑」,同樣身為爸爸嘅楊潮凱就留言話:「我明,我完全明白,因為我試過」。





Leave a Reply

Your email address will not be published.