早已離巢無綫「細龍太」陳思圻(前名陳偉琪)…

早已離巢無綫「細龍太」陳思圻(前名陳偉琪)早前接受節目訪問時就大爆在《愛·回家》拍劇時被老前輩用粗口問候教做戲。在劇中與細龍太有不少對手戲的大龍生羅樂林今日(23/9)現身電視城出席《愛·回家之開心速遞》宣傳活動,便就事件接受《香港01》訪問時笑說:「大家可放心嗰個人一定唔係我,因為我哋相處都幾好。而佢嘅工作態度都Ok唔錯嘅。其實新聞一出,我心諗話一個老前輩,唔係講緊我呀?而我同戲組係度傾,大家都諗唔到係邊個。(老前輩得你同歐瑞偉!)哈哈,等大家估吓係幾得意嘅。」

被問到陳思圻在劇中演技如何?羅樂林笑言:「好唔好呢,我就唔去評人,始終每個人都喺度學緊,包括我自己在內。(喺片場有否聽過用粗口溝通?)我諗係呢行都算係小問題,因為戲行嘅人係比較直接,開心會直接表達出嚟,唔開心又會直接表達,咁我覺得都冇所謂,咁我覺得佢係一個好高EQ嘅人嚟,佢係唔會唔開心。(你容唔容易俾人激親?)你要激到我,我諗都幾難,哈哈!」

Leave a Reply

Your email address will not be published.