歌手張繼聰出席《Welcome to route 37》…

歌手張繼聰出席《Welcome to route 37》演唱會記招暨創立時裝品牌發布會,透露闊別7年再開個唱,故會珍惜今次演出,對於其時裝品牌近日推出,阿聰直言現時一身蟻:「因為啲衫賣晒,反應好好,依家要預購,完全係超乎想像。」談到MIRROR演唱會發生不幸意外,問到阿聰今次個唱舞台可會減少機關?他說:「本身個舞台設計偏向簡單,似Live Show形式。」當日舉家觀賞頭場騷,阿聰不諱言對意外事件感驚訝:「呢件事全香港市民都好難過,我哋做呢行,個騷入面好多人都認識,現階段希望阿Mo快啲好番。(現場睇啲機關覺唔覺危險?)當時我好多時候都照顧住小朋友,第1場確實係有啲嘢未綵排好,但我唔評論啦!」

阿聰更指事發當日正在觀賞舞台劇,完場時收到有關片段,當刻感到震撼又難過,雖然女兒是「神徒」,但未有給她睇意外片,更指有個別慰問MIRROR成員:「畀啲時間同空間佢哋,相信佢哋嘅痛苦,普羅大眾係唔會明。」提到ViuTV現階段停止劇集宣傳,阿聰參與的《季前賽》原定8月尾播出,問到可受影響?他表示待有關方面安排。

對於網民炮轟意外發生時,Anson Lo及Edan未有理會傷者而繼續表演,阿聰表示:「表演者要承受嘅難處同痛苦,大家唔會明白我哋喺台上面經歷緊乜嘢,普通市民睇到發生乜事,好多人一生都唔會遇到,當時佢哋表演狀態,對住1萬人嘅騷,好亢奮,我好肯定5秒係唔知發生咩事,尤其戴住耳機,佢哋同阿Mo嘅關係,比任何人都密切,其實做呢行好慘,今次已經超越咗平時可以執生嘅地步,希望大家唔好再揣測,錫佢哋多啲啦!」








Leave a Reply

Your email address will not be published.