接連有《回歸》和《白色強人II》…

接連有《回歸》和《白色強人II》兩部劇集推出的視帝郭晉安,於《回歸》內靠兩名兒子幫手,成功與前妻陳煒復合;然而現實生活中,其雙親以往經常吵鬧甚至大打出手,令他留下陰影,不諱言希望時光倒流,能重回過去改寫歷史。

戲中有「囝囝」周嘉洛及吳偉豪「牽紅線」,塑造元宇宙世界令他與煒哥「重回過去」反思,最終破鏡重圓,郭晉安坦言現實生活中亦想重返童年:「我覺得一個人嘅成長深受原生家庭影響,所以我想返去做安慰嘅角色,因為兒時睇住父母吵鬧、甚至打交,佢哋打打吓我都開始唔驚嘞,諗番轉頭好想平息佢哋嘅風波。(童年好唔快樂?)又唔會喎,因為根本冇人理,好自由。」

那麼父母最終有否和解?他說:「其實唔係好清楚,因為好早就離開咗屋企,尤其入電視台做嘢後,本身屋企喺銅鑼灣,的士錢都夠我喺出面租屋住!(嗰個年代做藝人好風光?)搵得多又付出得多啫,起碼要置裝,好記得嗰時我仲要搭港鐵出入,而且好多地方唔去得,好似出去酒樓食飯,不停有人圍住攞簽名。」

他坦言如今與14歲囝囝偶有摩擦:「佢好想要主權,但我會堅守底線,清楚話畀佢知有啲嘢真係唔得,當然我都會尊重佢,好似佢留長頭髮同電髮,想做音樂家,我就冇出過一句聲。(如果你同太太鬧交,仔女有咩反應?)我哋協議咗唔會喺仔女面前鬧交,做呢行訓練到容易控制情緒。」

說到1997年,郭晉安離巢外闖,他形容當時要於股壇搵錢易如反掌:「好多人行埋嚟畀啲冧碼你,求其篤每日都可以賺幾萬。嗰時我拍一套戲片酬40萬左右,所以有閒錢投資,點知有日倒輸番晒落去,我就同自己講遲啲一定要贏返番嚟。(一共輸咗幾多?)當時嘅20幾萬,我翻咗本好耐,贏番凸唔知幾多倍嘞!」






Leave a Reply

Your email address will not be published.