藝人丁子朗19歲嗰陣就參加香港先生…

藝人丁子朗19歲嗰陣就參加香港先生,成為三料亞軍後入行,近年仲獲力捧有唔少演出機會,仲升呢做男主角,不過入行以嚟佢嘅星途並非一帆風順,佢日前接受陳敏之網上節目訪問,佢透露當初被家人反對入行,但係佢當年入讀大學一年就放棄學業,由加拿大來港追夢,佢希望靠自己闖一番事業:「我讀大學都有做兼職搵私己錢。最開心入行早年嗰陣父母嚟過香港探我,我可以畀到家用,畀咗啲錢佢哋使,唔想衰畀佢哋睇,你個仔喺香港唔係話撈得好掂,但過到活。知道入行後條路係漫長嘅,都希望最終係凱旋回歸。」但係佢事業都曾經遇過迷失期,試過有半年冇嘢做,佢趁嗰段諗過轉行,去咗考保險牌,佢覺得自己係個一定要做嘢嘅人。
佢入行初期亦受到受盡冷言冷語,不過佢並冇受到打擊,仲將負評轉化成推動自己發憤嘅動力,佢話:「試過有一次我拍劇,臨尾收廠28、29(凌晨4、5點),爭我一個笑容,佢要我笑,因為嗰時真係唔識做戲,我就係做唔到,笑唔得好,大家都好炆,大家等緊我。(即係唔合佢心意?)係,導演話不如嚟多次,現場就有一個工作人員就話,你擘大個口大家就收工啦!佢係咁鬧我!(有冇粗口?)一、兩個字,所以就覺得嘩!(咁你咪好傷心?)好傷心呀嗰下,但呢一件事好好,令我記得到依家,令我每次返工都唔會阻大家收工,呢個係我希望做到嘅嘢,第二就係你做得唔好會令其他人受罪。」

Leave a Reply

Your email address will not be published.