由阿Lam林子祥、林德信父子檔代言…

由阿Lam林子祥、林德信父子檔代言的手機儲積分App「yuu」,配合洗腦式廣告主題曲《YUU》,可謂深深打入市民腦海中。yuu最新推出網購平台「yuu to me」,代言人工作卻落在陳豪、陳茵媺手上,阿Lam兩父子的代言地位,疑似被陳氏伉儷極速取代。

陳豪同陳茵媺今次夫妻檔上場,廣告中同兩位小演員化身Incredible Family,十足迪士尼動漫《超人特攻隊》的超人主角。陳豪雙手能夠如軟膠般伸長,陳茵媺就擁有閃電俠速度,一家人在店舖內瘋狂購物。這次廣告的拍攝手法同阿Lam父子的MV有所分別,可能是廣告商刻意安排,希望塑造出兩種不同風格的代言人。

至於廣告主題曲方面,上次的《YUU》改編自阿Lam的經典作品《我愛你》,這首歌原曲是1983年Billy Joel的《Uptown Girl》。而今次由陳豪同陳茵媺主唱的主題曲,同樣是改編自阿Lam早年的作品——《成吉思汗》。根據網上資料,《成吉思汗》是德國樂隊Dschinghis Khan於1973年創作,1980年由鄭國江填上中文歌詞後,便交到阿Lam手上。看來阿Lam並不只是單純的代言人,在廣告商眼中更有崇高地位,所以一而再改編他的作品,向他致敬。

陳豪向來受廣告商喜愛,過往亦接拍了不少廣告,同陳茵媺早期拍拖時已經以情侶檔出席活動。二人在2011年首次合體搵錢,擔任手錶品牌的專門店開幕嘉賓。當日他們受訪時,陳豪表示:「好難得第一次公開見面,很開心,一齊賺錢都不錯,遲些才一齊拍劇。」當時的陳茵媺就期望二人可於同劇演出,「有更多機會去了解佢嘅性格。」

陳豪晚上以短訊回覆《晴報》,指這次完全無取代任何人的意思,「今次我同Aimee代言嘅係佢哋公司另一『服務性產品』,係door to door嘅運輸服務,所以並唔存在任何取代嘅意思。仲要係首次同太太一齊參與拍廣告,覺得非常開心,我哋兩個經常會出席好多唔同嘅商業活動或者晚會演出,但係夫妻檔拍廣告都係第一次,有種出其不意嘅新鮮感。(負責唱主題曲?)廣告會有幾個唔同版本,相信會因應唔同時段推出。今次我哋有參與唱廣告主題曲,係我同Aimee第一次嘅合唱,能夠同佢一齊拍廣告,真係十分難得。如果要全家一齊拍廣告……實在係唔能夠想像。」

Leave a Reply

Your email address will not be published.