無綫台慶劇《拳王》昨晚(29日)…

無綫台慶劇《拳王》昨晚(29日)劇情講述黃子恆飾演的葉迎風,參加泰拳冠軍賽,由於赤裸上身,子恆Fit爆身形盡現,其拳腳功夫亦相當有睇頭,尤其踢腿動作,不但有力,而且踢腳踢得相當高,足證其下了不少苦功。

該劇監製Andy坦言該場拳賽戲難度極高,故劇組除了已事先安排定替身給子恆外,負責動作指導的冼灝英師傅亦沒有為子恆設計太高難度動作;不過對自我要求頗高的子恆,認為既然要飾演拳王就要似模似樣,故除了堅持所有動作均親身上陣、拒用替身外,並即場要求冼師傅教授高難度動作,務求令拳賽拍出來更像真。結果子恆亦不負眾望成功完成所有拍攝,現場所有「見證」賽事的其他演員均大讚他打得出色,Andy透露子恆拍畢該場戲後翻看Playback時,更激動落淚。
激動落淚
對於拍拳賽戲激動落淚,子恆回應指最感動是Cut機後現場所有人、包括演員和幕後均為他鼓掌:「其實好多動作我之前都未做過,到真係做到嗰吓其實好激動亦好感動;我成日諗如果我畀唔到難度高嘅動作出嚟,我會對唔住葉迎風呢個角色,我希望觀眾係真係會覺得,葉迎風係真係識打拳嘅。」子恆又感激飾演其對手的陳偉洪說:「對手好緊要,如果大家有留意踢膝嗰吓其實相當近,佢為咗拍出嚟效果好,好肯『硬食』我啲招式,佢咁樣令我啲動作做得更加放心。」
另外,近期獲讚好戲的譚俊彥,於劇中張振朗回憶片段中,含着淚訴說自己花上極大心血去打拳,結果卻換來假賽果之不甘心,短短1分鐘戲份已充份演繹出拳手的辛酸及對公義的堅持,難怪視帝呼聲甚高。而在戲中有場淋雨戲的黃子恆,則指該場戲最難忘部份是相當凍:「嗰日突然翻風、得11度左右,我當時嘅戲份係棉質嘅短衫同裋褲,一瞓落地超級索水同埋超級凍,好彩嗰日現場咁啱有風筒咋!但其實我幾鍾意呢啲場口,因為真係拍戲先做到。」






Leave a Reply

Your email address will not be published. Required fields are marked *