前港姐冠軍黃嘉雯(Carmaney)…

前港姐冠軍黃嘉雯(Carmaney)圓夢成演員,日前大晒香肩出席處女劇《把關者們》嘅宣傳活動,仲擔任埋主持,令佢緊張又興奮!講到佢喺劇入面終於出場,Carmaney話每晚都有準時收睇,但始終係首次見到自己喺電視入面演戲,笑說個感覺好怪:「可能自己要求高,睇番硬係覺得可以再做好啲,首先有演技啦,再嚟就係心態!啱啱拍劇係好緊張,做海關拘捕人嘅時候,講嗰啲字眼要啱,好驚錯之下成個人都硬晒!希望之後可以放鬆啲,因為咁先入到戲。」又開心謂有好多朋友都有捧佢場,之後都有畀好多意見佢改進。
除咗朋友之外,Carmaney話拍嗰陣都有「軍師」,呢個人就係劇中飾演佢上司嘅袁偉豪:「對佢有最多對手戲。(有冇壓力?)初頭有,但佢對我好好,教我好多嘢,例如點先唔會太死記硬背對白。」續自爆加戲「暗戀」對方:「本身我係好仰慕呢個呀頭,我就加少少暗戀佢嘅元素,因為我太崇拜佢,覺得佢好正,不過拍完即刻抽離嘅,哈哈!」

Leave a Reply

Your email address will not be published.